Irteera eman aurretik, azken bi urteetan zendu diren Fermin Kaminos antolakuntzako kideari, eta Iñigo Goikoetxea eta Xabier Gartziarena boluntarioei omenaldia egin diote. Haien familiak izan dira bertan, eta lasterketako kamiseta bana jaso dute, argazki banarekin, oroigarri moduan. Agurra ere dantzatu dute. Antolakuntzatik eskerrak eman dizkiete urte hauetan lasterketa hau aurrera eramateko egin duten lanagatik.
Giro aparta izan dute aurtengoan IV. Negu Trail lasterketan. Hotza eta bidean, gainera, lokatza ere izan dute parte hartzaileek. Hala ere, hori ez da arazo izan aurtengo irabazle izan den Hodei Samaniegorentzat. Samaniegok 01:21:10ko denboran amaitu du proba, eta, beste behin, proba “azkarra” eta “polita” izan dela adierazi du irabazleak: “Lehenengo biak oso azkar hasi dira, baina lehen igoeran aurrea hartzea lortu dut. Azkarra izan arren, gaurko proba beti bezain polita izan da. Gainera, antolakuntzari beti esaten dioten moduan, publikoak sortzen duen giroa ere izugarria da”.
Lehen postua lortzen saiatu bada ere, Martin Diez segurarrak bi minutu gehiago behar izan ditu 16,3 kilometroak egiteko, bigarren helmugaratuz. “Paraje oso politak daude inguruan, baina gogorra ere izan da. Ez nuen oso ondo ezagutzen ibilbidea, proba egiten nuen lehen aldia izan baita. Ez nekien noiz bukatzen zen, horregatik, azken zatia izan da niretzat gogorrena, baina baita polita ere”, esan du Diezek.
Hasiera txarra izan badu ere, hirugarrena Iñaki Olano altzotarra izan da, eta honek, 01:23:47ko denborarekin amaitu du aurtengo proba. “Atzetik aurrera egin dut. Hasieran oso sentsazio txarrarekin hasi naiz, bularra erreta. Berotzen joan naizen heinean, konfiantza hartu dut, eta hortik aurrera oso gustura joan naiz”, kontatu du Olanok. Hirugarren postua lortzeko lehia izan du beste bi korrikalariekin batera, baina azken aldapari esker aurre egitea lortu du hirugarren postua eskuratuz.
Sinistu ezinik emakumezkoetan Leire Baraibar zumaiarra iritsi da lehena plazara, eta 01:46:35ko denboran amaitu du lasterketa. “Uste nuen bigarren nindoala, eta bat-batean helmugan zinta ikusi dudanean harritu egin naiz. Sorpresa izan da lehenengoa izatea, ez bainuen espero”, adierazi du Baraibarrek.
Zazpi segunduko aldearekin (1:46:42) amaitu du Oihana Zubillagak bigarren postuan. “Hasiera gogorra egin zait, lasterketak beti azkar hasten baitira. Goraka neurtzen joan naiz, eta jaitsi behar zen unean azkartzen hasi naiz”, kontatu du Zubillagak. Hala ere, “pozik” eta “sentsazio onarekin” amaitu du aurtengo lasterketa anoetarrak.
1:47:15eko denborarekin eskuratu du hirugarren postua Laiane Arrospide tolosarrak, eta emaitzarekin “pozik” eta “gustura” geratu dela kontatu du: “Une batean hankak gogorrak sumatu ditut, baina disfrutatzen ari nintzen eta oso pozik eta gustura geratu naiz”.
Berastegiarrak ere podiumean
Lehen herritarra gizonezkoetan Oier Garaiburu izan da, 1:29:55eko denborarekin. “Herriko karrera izanda ilusio handia egiten du, eta herria aurrean izanik gehiago. Honek aurrera jarraitzeko ilusioa ematen dit, eta horrelako gehiago etortzen badira hobe. Aurrera jarraituko dugu ahal den hoberena”, esan du Garaiburuk. Emakumezkoetan, berriz, Aiora Lasartek lortu du podiuma egitea, 2:09:02ko denborarekin. Garaibururen antzera, Lasartek ere herriko inguruko mendiak ezagunak zituen. Izan ere, ez da lasterketan parte hartzen zuen lehen aldia. Aurtengoan, ordea, bakarrrik atera behar izan duela kontatu du: “Normalean, lagun batekin ibiltzen naiz mendian, eta gaur ezin izan du atera. Gogorra egin zait, baina beregatik egin dut".
Sailkapenak
Gizonezkoak:
- Hodei Samaniego (1:21:10)
- Martin Diez (1:23:10)
- Iñaki Olano (1:23:47)
Emakumezkoak:
- Leire Garmendia (1:46:35)
- Oihana Zubillaga (1:46:42)
- Laiane Arrospide (1:47:15)
Herritarrak:
Oier Garaiburu (1:29:55)
Aiora Lasarte (2:09:02)
Gaurko lasterketako sailkapen guztiak Kronoak webgunean ikusgai.
