Berastegiko Udala azken urteetan
lanketa bat ari da egiten, parte hartze saioetako hainbat hausnarketetan sakondu, eta ideia horietatik tiraka praktika eta aplikaziorako dinamika berriak sortuz. Lan lerroetako bat da artzaintza eta gaztaren kulturari dagokiona, eta horren barruan, udaleko hainbat ordezkarik lehen eskutik ezagutu nahi izan dute herriko jarduera. Horretarako, larunbat goizean, herriko hainbat baserri zein ukuilu bisitatu zituzten.
Lehenik, Gazpio artegira egin zuten bisita. Ardiak nola jezten dituen ikusteaz gain, Jose Inazio Ugartemendia artzainarekin bere egunerokotasuna nolakoa den ikustera gerturatu ziren. Bitartean, bere instalakuntzak ikusteko aprobetxatu zuten.
Ondoren, Berastegiko artzaintzan zeresan handia duen Andres Etxeberriarekin elkartu ziren. Garai batean bezala egin zuten gazta, Etxeberriak berak eginak zituen egurrezko tresnekin. Esaterako, osinak erabili zituzten iragazki moduan, eta aurrerapen gehiegi ez zegoen garaian oinarriko tresnekin gazta nola egiten zuten ikasi zuten.
Jarraian, Bengoetxe baserriko ukuilura egin zuten bisita, eta bertan, Koro Artolaren egunerokotasuna nolakoa den ikusteko aukera izan zuten. Bertatik bertara gerturatu ziren Berastegiko artzaintzaren errealitatera. Amaitzeko, Juangone baserrikoen Solarko borda eta txabola ezagutu zituzten, eta, baita Berastegiko hainbat gazten dastaketa burutu ere.