A-15 errepidea itxiko dute bi noranzkoetan, ostiraletik larunbatera

San Lorenzo-Larre tunelaren barruko lanak direla eta, zirkulazioa erabat geldituko dute gau batez. A-15a, beraz, 22:00etatik 08:00etara itxita egongo da.

Urriaren 11n, ostiralean, A-15 errepideak 22:00etan erabat itxiko dute. San Lorentzo-Larre tunelean lanak egiteko baliatuko dute itxialdia, 08:00ak arte. Andoaingo noranzkoan erabaki behar dutenek, Berastegiko lotunean bira eman beharko dute, GI-2130 errepidea hartuz Tolosaraino. Hortik aurrera N-1 errepidea hartuko lukete A-15arekin Sorabillan bat egiteko.

Iruñerako noranzkoan, berriz, Sorabillako lotunean eman beharko dute bira, N-1 errepidean Tolosaraino joateko eta ondoren GI-2130 errepideaz Berastegiraino. 

Ibilbide luzeetarako eta ibilgailu astunentzako, aldiz, N-1 errepidea gomendatu dute Altsasuraino, eta A-10 autobia Irurtzuneraino. 

Gipuzkoako Foru Aldundiak bidalitako oharraren arabera, San Lorentzo-Larren egin beharreko lanen artean dago tuneleko elementu kritiko batzuk elikatuko dituen koadro elektriko berri bat instalatzea. 

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

BATAK BESTEA DAKAR


EGIN ATARIKIDE!