Landaguneetan, hondakin organikoaren trataera nolakoa izaten den ezagutu nahi zuten, izan ere, gaur egun, Txinan arazoa daukate organikoaren bilketarekin, eta irtenbide bila egin dute bidaia, Espainiar Estatuko eta Euskal Herriko hainbat herrietara.
Txinako gobernuko hainbat ordezkari, unibertsitateko ikerketa zuzendari, Gobernuz Kanpoko Erakundeetako eta fundazio desberdinetako hainbat ordezkari, ingurumen aditu eta aholkulariak Berastegin barrena ibili ziren hondakin organikoa biltzeko ezarrita dauden auzokonpostagailuak ezagutzen. Bide batez, beste hondakinen bilketa sistema ezagutzeko tartea ere hartu zuten. Amaia Azkue Berastegiko alkatea aritu zen argibide guztiak ematen, eta honek, Josu Amilibia Adunako alkatea eta Mankomunitateko lehendakaria ere gonbidatu zuen bisitara.