Txupinazoa bota aurretik Garaiburu anaiak gogora ekarri nahi izan ditu Amaia Azkue alkateak: «Azken egunak ez dira batere gozoak izan herrian, baina festak pozik igarotzea da gure desioa. Udal taldearen izenean besarkada bat bidali nahi diegu guretzat horren eragile eta pertsona garrantzitsu diren Leire, Mireia eta beren familiari».
Segidan Ion Azpiroz Azpiroz mendi lasterkariak hartu du hitza. Bera izan da aurtengo pregoilaria. Festei hasiera emateko aukera izatea, baita berastegiarra izatea bera ere «ohorea» dela azpimarratuz hasi du bere hitzartzea: «Gonbidapena bidali nindutenetik buelta asko eman dizkiot: zer esan, nola esan, nola bizi unea. Bereziak direlako guztiontzat herriko festak. Gogoan dut nola jokatzen genuen pilota txapelketa gazte ginela, nola puskatu nuen hanka kontzertu batean, herri kiroletan nola irabazten edo galtzen genuen... Eskerrak ematea gustatuko litzaidake udal talde osoari nitaz oroitzeagatik».
Festak bizitzerik izango ez dituzten euskal presoak eta espetxean dauden Altsasuko gazteak ere gogora ekarri nahi izan ditu. Eraso matxistarik gabeko eta jai parekideen aldeko aldarriarekin amaitu du Azpirozek: «Ez beti da ez! Jai onak pasa, gora Salontzoak!».
Suziria lehertu bezain pronto buruhandiak irten dira plazara, txistularien eta trikitilarien doinuez alaituta. Gero lehen paxaka txapelketako eta pala txapelketako finalak jokatu dituzte. Arratsaldean, berriz, herriko gazteen arteko herri kirol desafioa izango da, eta gauean afaltzeko bilduko dira herritarrak, eskola aurrean.
Eta hau guztia, festetako lehen egunean. Beste lau izango dituzte aurretik.
