Berastegiko Udalak herriko adinekoen beharrak ezagutu nahi ditu, eta hori dela eta bilera deitu du ostiralerako, hilak 19, 18:00etan Gaztainondo elkartean. Mokadutxoa egiteko aukera ere izango dute bertaratzen direnek.
Udalak gogoratu du duela hilabete inguru galdetegi bat banatu zutela etxez etxe, eta erantzunetan adinekoek hainbat gabezia dituztela sumatu dituztela. "Hau horrela izanda zuen beharrak, nahiak eta ideiak entzun nahi ditugu", esan du. Era berean, Gaztainondo erretirodunen elkarteko urteko batzarrean ere hainbat gai atera zirela gogoratu du, eta horiek ere landu nahi dituzte ostiraleko bileran. "Berastegi herriak dituen baliabide eta aukerekin, guztiontzat egokienak izan daitezkeen proposamenak aurrera eramaten saiatuko gara", gaineratu du.