16:30etik hasita, lau mailatako partidak jokatu dituzte. Herriko gazte ugari bildu dira finalak ikusi eta partaideak animatzeko gogoz.
Bikote mistoak
Guztira 12 bikoten parte hartu dute maila honetan. Ibon Garaiburu eta Aiora Lasartek, alde batetik, eta Julen Garaiburuk eta Mireia Garaiburuk, bestetik, osatutako bikoteek lortu dute finalera iristea. Lehenak izan dira garaile: 30-21 irabazi dute arratsaldeko lehen finalean.
Mutilak, buruz buru
Guztira 16 gizonezkok eman zuten izena maila honetan. Finalera, Iker Saizar sailkatu zen lehenengo. Beste finalerdian, berriz, Mitxel Etxeberria eta Endika Pelaezek jokatu behar zuten. Etxeberria, ordea, min hartuta zen eta zuzenean Endika Pelaez sailkatu zen finalerako. Hain zuzen, Pelaez izan da txapelduna: 30-16 irabazi du.
Mutilak, binaka
Hemen ere 16 bikote izan dira lehian. Finalera iritsi diren bi bikoteak hauexek izan dira: Julen Garaiburu-Iker Saizar eta Ibon Garaiburu-Xabier Saralegi. 30-24 gailendu dira Garaiburu eta Saizar.
Neskak, binaka
Nesken binakakoan, berriz, 10 bikotek hartu dute parte. Mireia Barriola eta Eneritz Lasartek osatutako bikoteak, Olaia Garaiburu eta Leire Gartziarenaren aurka jokatu dute finala. Lehen bikoteak lortu du garaipena: 30-13.
Datorren astean, Gazte Festen barruan, egingo dute sari banaketa.