EH Bilduren zazpi kide (tartean, lehendakaria), EAJren hiru ordezkari (tartean lehendakariordetza) eta udal talde independentetako batek osatu dute batzorde berria. Uemako lehendakari berria, hortaz, Josu Labaka Azpeitiko EH Bilduko zinegotzia izango da.
Gaurko bileran ez dute parte hartu Tolosako eta Lekeitioko udaletako ordezkariek; ez dute argitu mankomunitatean jarraituko duten edo ez. Tolosaldeko Atariari eskainitako elkarrizketan zalantzan jarri zuen jarraipena Olatz Peon, Tolosako alkateak. EAJren esku daude bi udal horiek. Nolanahi ere, ia salbuespena dira bi kasuak, EAJren agintepean dauden beste 11 herrik jarraituko baitute Ueman. Areago, zuzendaritzan sartu dira hiru herri: Gatikaz gain, tartean dira Zarautz eta Zestoa.