Urtebete bete du atzera zabalik Baliarraingo Zartagi ostatuak, eta herritarren arten ospatzeko bertan erabiltzeko bonuak prestatu ditu Baliarraingo Udalak. Interesa duten herritarrek 20 euroren truke eskuratu ahal izango dute ostatuan erabiltzeko 30 euro balio dituen txartela, eta udalak bere gain hartuko ditu 10 euro horiek.
Dagoeneko eskuragarri daude bonuak, eta martxoaren 29a izango da erabiltzeko azken eguna. Udaletik adierazi dute neguko hilabeteak «zailak» izaten direla ostalarientzat, eta testuinguru horretan babesa adierazteko ere balioko dutela bonuek: «Denon artean ospatu nahi dugu Zartagi ostatua berriro ireki zela. Bonuek aukera emango digute bertan elkartzeko eta guztion artean gozatzeko».
Eskuratzeko baldintzak
Aipatutako bonuak udaletxean dituzte eskuragarri herritarrek, eta ez da adin zehatzik behar erosi ahal izateko. Herritar bakoitzak, gehienez, bi txartel erosi ahal izango ditu, eta ostatuan bazkarian zein afarian erabili ahal izango dira.
Dena dela, txartelak norberak bakarrik erabili ahal izango ditu, hau da, ezin dizkiote beste pertsona bati eman. Erabiltzeko garaian, kontuak 30 eurokoa izan beharko du, gutxienez, eta handiagoa bada norberak ordaindu beharko du gainerakoa bonuarekin batera. 60 eurotik gorako kontuetan, berriz, bi bonu erabili ahal izango dira.