Alfontso Jauregi Oiarbide baliarraindarra hil zen atzo, ostirala, 68 urterekin. Baliarraingo Andre Mari festetan egin ohi den txirrindulari igoeraren antolatzaileetako bat zen –25 lagun inguru aritzen dira lan horretan–. Ama Birjin egunean izan ohi da, eta festetako ekitaldi nagusietako bat da. Jauregik 50 urte inguru zeramatzan antolakuntzan.
Iaz, elkarrizketa eskaini zion Jauregik ATARIAri, txirrindulari igoeraren 60. edizioaren aurretik. Elkarrizketa hartan aipatu zuen gogoan zuela igoeraren lehen edizioan txirrindulariak animatzen aritu zela errepide bazterrean.
Besteak beste, Jokin Mujikak eta Ion Izagirrek parte hartu zuten Baliarraingo probaren edizioren batean. Edizioaren 50. urteurrenean, txirrindulari ormaiztegiarrak ezarri zuen probako marka onena: bost minutu eta berrogeita bost segundo.
Gaur egin dute Jauregiren omenezko hileta elizkizuna Baliarraingo Andra Mari elizan.
