Baliarraingo Atari Soro pilotalekuak hartuko ditu VIII. Ataria Pilota Topaketaren finalak. Larunbatean, ekainak 29, izango da finalen jaialdia, 10:00etan hasita. Lehenengo aldiz jokatuko dira finalak Baliarrainen, eta herriko hiru pilotari ariko dira bertan.
Guztira zazpi final jokatuko dira eta lehenengoa eskuz jokatuko da, benjamin B mailan: Txulobiko Imaz eta I. Aburuza adunarrak eta Zazpi Iturriko Nazabal baliarraindarra eta Zuriarrain amezketarra ariko dira. Bigarrengoa ere eskuz izango da, benjamin A mailan: Behar Zanako Zufiria eta Landa billabonatarrak, eta Tolosa elkarteko Altuna berrobitarra eta Eskudero tolosarra. Hirugarren finala ere eskuz izango da, aurtengoan berritasuna den nesken benjamin eta alebin mailakoa: Albizturko pilota eskolako Aizpurua albizturtarra eta Otsabioko Olariaga lizartzarra, eta Intxurreko Garcia alegiarra eta Albizturko pilota eskolako Pinto albizturtarra.
Palaz izango da laugarren finala, benjamin-alebin mailan: Bidania-Goiazko pilota eskolako U. Aburuza eta U. Lasa bidaniarrak, eta Ziotzako Odriozabala zizurkildarra eta Behar Zanako Elosegi billabonatarra. Bosgarrenean eskuz ariko dira alebin mailakoak, lauak Zazpi Iturrikoak: Artola eta Gorostidi amezketarrak, eta Arteaga eta Nazabal baliarraindarrak. Seigarrengoan, infantil mailakoak palaz: Intxurreko Ormaetxea orendaindarra eta Elduaien altzotarra, eta Behar Zanako Ortiz de Murua zizurkildarra eta Txulobiko X. Aburuza adunarra. Azken finalean, infantil mailakoak eskuz ariko dira: Behar Zanako Zufiria eta Larrarte billabonatarrak, eta Behar Zanako Illarramendi aiarra eta Txulobiko Navarro adunarra.
Eguna girotzen laguntzeko, Baliarraingo taberna irekiko dute herritarrek eta pintxoak eta edariak salduko dituzte bertan.
