Erromeriaren omenezko horma irudi bat margotu dute Baliarrainen. Garai batean San Juanen ezkutuko erromeriak antolatzen zituzten, eta igandero erromeriak egiteko ohitura ere bazuten herriko plazan. Udaletik azaldu dutenez jendea elkartzeko balio zuten ekimen haiek: «Jendea elkartu, harremanak egin, ondo pasa eta gozatzeko egunak ziren, trikiti eta panderoaren alaitasunarekin».
Irudi berrian Euskal Herriko erromeriarekin harremana duten pertsonaiak bildu dituzte. Batetik Maurizia, Maurizia Aldeiturriaga Zabala (Zeberio, 1904-1988) pandero jotzailea. Hamabi urterekin plazan jotzen hasi zen, eta gerra garaian ez-ezik, ia bizi guztian aritu zen panderoari lotuta. Eta bestetik, Josune Arakistain Salas (Lastur, 1996) pandero jotzailea ere agertzen da. Hamazazpi urterekin Euskal Herriko trikitilari gazteen txapelketa irabazi zuen; eta ezaguna egin da Huntza taldeko abeslaria eta trikitilaria izateagatik. Irudian ageri den dantzaria, berriz, Sua Enparantza Alustiza (Donostia, 2003) antzezle eta dantzaria da; Kukai dantza taldeko kidea. Hori horrela, hainbat belaunaldi elkartu ditu artistak horma irudian.
Margotzen Nextor Otaño (Pasaia, 2003) Nexgraff aritu da. Aitarekin batera margotzen hasi zen 2017. urtean. Espraiekin margotzen aritu bada ere, gaur egun pintzelarekin aritzen da beste testura eta amaiera batzuen bila. Eskualdeko hainbat herritan egin ditu muralak, eta bigarrena du Baliarrainen.
Baliarraingo Udaletik gogobeteta azaldu dute horma-irudiaren helburua: «Mural berri honekin kaleko arte erakusketarekin jarraitzen dugu, herriko buelta atseginagoa izateko herritarrentzat eta bisitarientzat. Honekin batera, arteak eskaintzen duen estetika, istorioa, memoria eta hausnarketarako gaitasunarekin gozatu dezagun».