Bezperak eta ondorenak

Ama Birjin bezperan hasi, eguna bera ospatu eta ondorengo egunerako ere indarrak gordeko dituzte festarako Baliarrainen. Hiru egun festaz bete-beteta izango dituzte. Txupinazoa lehertzean hasiko dituzte jaiak eta abuztuaren 16an, herri afariarekin eta ondorengo erromeriarekin amaituko dituzte festak. Herri afarirako tiketak Zartagi jatetxean egongo dira salgai.

Urteroko hainbat hitzordu mantendu dituzten aurtengo festetarako. Tartean, Ama Birjin egunean ospatuko den Jexux Nazabalen oroimenezko bizikleta lasterketa. Aurten, berrogeita hemezortzigarren edizioa izango da. Eredu enpresa paretik hasi eta plazarainoko bidea osatu behar izaten dute parte hartzaileek, denera bi kilometro inguruko ibilbidea osatuz. Antolatzaileek esan dutenez, edonork hartu dezake parte.

Hurrengo egunean, abuztuaren 16an, mozorro eguna izango dute, eta gai baten bueltan jantzi beharko dute herritarrek: aurten, kirolaren inguruko mozorroak prestatu beharko dituzte. Eta eguna, toka eta maratoi herrikoiarekin hasiko dute. Adinaren arabera, herrian buelta bat, bi edo hiru eman beharko dizkiote korrika. Eta azken kartutxoak mus txapelketarekin, puzgarriekin eta herri afariarekin gastatuko dituzte.