Koronabirusa

Ahal dela, bertakoaren alde

Saltoki txikiak itxita daude eta supermerkatuak zabalik. Azoka egiteko ere nahikoa komeri. Horren aurrean, Baliarraingo Udalak, herriko baserritar eta produktoreekin elkarlanean, bertako produktuak etxeetara banatzeko ekimen bat jarri du martxan. 

Herritarrei mezua zabaldu zaie, zein produktu eskuratu daitezkeen zerrendatuz, eta behin eskaria eginda, udaleko kideak arduratzen dira etxeraino eramateaz. Astean behin hartzen dute horretarako tartea. Momentuz, ostiraletan.

Larreta baserria, Argaia Goena baserria, Eguzkilore okindegia, Aranburu oilategia, Pagoa garagardotegia eta Irabi Azpiko baserria dira, besteak beste, ekimenean parte hartu dutenak. Horrela, esnekiak, haragia, ogia, garagardoa eta barazkiak behintzat eskura ditzakete herritarrek, herrian bertan. Josu Ozaita alkateak azaldu duenez, «inguruko baserritarrei kontsumoa jaitsi egin zaie, eta aukera eman nahi izan diegu beraien produktuak nolabait behintzat bideratzeko». Beharrezko neurriak hartuta egiten ari direla dio, eskularruak eta jantzita. «Etxez etxe banatzen ditugu jendearen eskariak, horrela jendeak ez dauka supermerkatuetara jaisten ibili beharrik».

Etorkizunera begira, beste kontsumo eredu bat bultzatzeko ere izan daitekeela dio Ozaitak eta kontsumo sare bat eratzeko aukera polita ikusten du: «Ekimen hau momentuko erantzun bat izan da, baina aukera bat izan daiteke jarraipena emateko, herritarrek nahi badute, noski, gu saiatuko gara bide hori lantzen».

Erlazionatuak

Laguntza sareak, elkar zaintzeko

Tolosaldea

Konfinamendua ezartzeak, etxetik ezin ateratzea dakar. Arrisku egoeran dauden horiei laguntzeko, besteak beste, erosketak egiteko, boluntario sarea...

Albiste hau ATARIKIDEei esker argitaratu dezakegu. Haiei esker Tolosaldeko albisteak libre, euskaraz eta kalitatez irakurtzen dituzu. Horrela izaten jarraitzeko eman babesa Tolosaldeko Atariari eta ZU ERE IZAN ZAITEZ ATARIKIDE.

#EgitenDuzunaGara


EGIN ATARIKIDE!