Hilabete korapilatsuak izan dira Baliarrainen, udalaren kudeaketari begira. Martzelino Dorronsorok, 20 urtean alkate aritu ondoren, pasa den maiatzeko hauteskundeetara berriro aurkezteko indarrik ez zuela azaldu zuen, baina haren hutsunea betetzeko hautagairik ez zen aurkeztu bozetara. Herria herritarrek ordezkatu gabeko udalik gabe geratzearen arriskuak, eta "Martzelinok ordezkorik ez zela ikusita hartutako penak", ordea, herritar talde bat lanean hastera bultzatu zuten.
Horrela, Olatz Iriarte, Ane Garmendia, Luis Lopez, Mikel Telleria eta Jokin Garmendiak osatu zuten, abenduaren 20ko hauteskundeetarako herritarren zerrenda. Gaur egindako kargu hartzearekin, beraz, Olatz Iriartek eta bere lan taldeak ia lau urte dituzte, aurretik, Dorronsororen lekukoari heldu eta aurrera egiteko.
Kargu hartzean, Dorronsorok esker hitzak eskaini nahi izan dizkie udal ordezkari berriei: "Eskerrik asko lekukoa hartzeagatik, eta animo zuen lanean". Bere aldetik, Olatz Iriarte alkate izendatu berriak ere jarrera bera erakutsi du alkate ohiarenganako: "Eskerrak zuri, Martzelino, 20 urteotan herriarengatik egin duzun guztiagatik".