Euri langarra gorabehera, urteroko hitzordua berritu dute Asteasun. Herriko jaien barruan soka dantza egin dute gaur, San Pedro egunez, eta segidan hamaiketakoa jateko aukera izan dute bertaratu diren herritarrek.
Izatez, esku pilota partidak ere jokatu behar zituzten soka dantza amaitutakoan, baina Asteasuko Udalak jakinarazi du bihar 10:00etan izango direla norgehiagokak. Goizeko hitzorduez harago, arratsaldean ere izango dituzte jarduerak Asteasun, besteak beste, magia ikuskizuna, kalejira eta Izer eta Alabier trikitilarien kontzertua.
Bihar, azken eguna
San Pedro egunaren ondotik, jubilatuen eguna izango dute bihar Asteasun, eta egun osoko jardunaren ostean, Sorgina igotzearekin batera bukatuko dituzte herriko festak.
