ELA, LAB, CCOO, ESK, SATSE eta Steilas sindikatuek grebara deitu dituzte Arabako, Bizkaiko eta Gipuzkoako langile publikoak. Eskualdean ere bat egin dute deialdiarekin eta herriz herri egin dituzte mobilizazioak. Esaterako, Asteasuko Udaleko zein herriko gainerako langile publikoek elkarretaratzea eta asanblada egin dituzte plazan. Bertan, aurretik galdutako erosteko ahalmena berreskuratzeko konpromisoa hartzea, pribatizazioei atea ixtea, enplegu publikoa sortzea eta kontsolidatzea, lan orduak murriztea eta lan kargak arintzea izan da, besteak beste, langile publikoek eskatu dutena.
Herritarrekin ere partekatu dituzte euren eskakizunak, «sektore publikoaren aldeko borrokan egin nahi genituzkeen hurrengo urratsak elkarrekin irudikatzeko». «Badakigu etsipenaren indarra handia dela egungo gizartean. Inguruko herrietan ere, jakin dugunez, antzeko gogoetak piztu dira langile publikoen asanbladetan. Gurea ekimen txikia da, talde txikia gara Asteasuko herritarrak eta udal langileak. Baina era berean, ez dugu etsipen hau gehiago elikatu nahi, eta gure esku dagoen horixe behintzat egin nahi dugu. Elkartu, kolektibo sentitu, eta gure inguruan borrokatzeko grina kutsatu».
