Atzoko parrandaren ajearekin batzuk, dantzarako gogoz besteak, baina herritar gehienak dotore jantzita. Horrela elkartu dira gaur asteasuarrak Elizmendi auzoko San Pedro elizaren atarian. Dianaren eta meza nagusiaren ondoren, alkate soinua joz, txistulariekin batera ohiko ibilbidea egin dute udal gobernuko ordezkariek. Ondoren, dantza-sokaren txanda heldu da.
Urteroko zita da bertan San Pedro egunez egiten den dantza saioa, inork galdu nahi izaten ez duena. Gaur ere jendetza bildu da dantzarien saioa ikusteko. Emanaldi bikaina izan da, maila altuko dantzariekin, eta Elene Zeberio aurreskuaren eta Beñat Beobide atzeskuaren saio dotoreekin.
Behin dantza saioa amaituta, indarrak berreskuratzeko unea heldu da, eta eliza atarian hamaiketakoa jarri dute, edonoren eskura. Bien bitartean, pilota eskolako alebin eta benjaminen finalak jokatu dituzte eliza atzeko frontoian.
- Arratsalderako egitaraua:
- 18:00. Kalejira: Herriko trikitilariak, txistulariak, koroa, buruhandiak eta erraldoiak.
- 22:30. Bertso saioa: Sustrai Colina, Nerea Ibarzabal, Alaia Martin eta Unai Mendizabal. Gai- jartzailea: Igotz Alkorta.
- Ondoren. Erromeria Laiotz taldearekin.