Azken egunetan Siemens Gamesan emango diren kaleratzeen inguruan publiko egin diren berrien aurrean, LAB sindikatuak adierazi du ez duela inongo jakinarazpen ofizialik jaso. «Informazio bakarra komunikabideetatik eta langileek barne posta bidez jaso duten mezu batetik iritsi zaigu. Mezu horretan enpresa bideragarria izateko 2.900 kaleratzeen beharra aipatzen da mundu mailan, horietatik 475 espainiar estatuan, baina ez dute zehaztasunik eman kaleratzeak non eta noiz emango diren».
LAB-ek gehiengoa duen Siemens Gamesa Asteasuko plantan, akordio batera iritsi dira zuzendaritzarekin. «Enpresak dituen zailtasunen aurrean eta etorkizunean hau saltzeko dauden aurreikuspenen aurrean, akordio honekin langileen etorkizuna bermatzea lortu dugu. Enpresako hitzarmena berritzeaz gain, lan karga, lanpostu eta lan baldintzen bermea adostu dugu».
Azkenik, akordio honen garrantzia nabarmendu du sindikatuak. «Zalantzaz beteriko etorkizun batean bertako langileen etorkizuna bermatzen duelako. Honetaz gain instituzioei exijitzen diegu enpresa saltzeko aukeren aurrean beraien konpromisoa bertako erosle bat bilatzeko, Euskal Herrian estrategiko izango den sektore baten alde egingo duena».