Errusiako Munduko Kopa hasteko bi egun falta direnean, Luis Rubiales Espainiako Futbol Federazioko presidenteak Julen Lopetegi Espainiako entrenatzaile postutik kendu du. "Ez da justua gure langile batek halako negoziazio bat egitea guri ezer esan gabe. Agiri bat kaleratu baino bost minutu lehenago izan genuen guztiaren berri, eta hori ezin da izan. Lan bikaina egin du Lopetegik, baina moduak ere garrantzitsuak dira. Errespetu handia diot Lopetegiri. Sekulako entrenatzailea da. Horregatik, oso zaila egin zait erabaki hau hartzea. Baina, esan bezala, moduak oso garrantzitsuak dira", esan du Rubialesek.
Lopetegi eguerdian prentsaurrekoa ematekoa zen, baina azkenean bertan behera geratu da agerraldia. Asteasuarrak 2016an hartu zuen Espainiako selekzioko hautatzaile kargua.