Asteasuarrak ondo ezagutzen du Real Madril, sei urtez aritu baita bertan aurretik. Bost urtez jokalari zenean, hiru urtez bigarren taldean (1985-88) eta bi urtez lehen taldean (1989-91); eta urtebetez entrenatzaile lanetan (bigarren taldea zuzendu zuen 2008-09ko sasoian).
Real Madril B utzi ostean, 2009an, Espainiako azpiko selekzioak entrenatzen hasi zen asteasuarra. 2014ra arte aritu zen lan horretan, Portugalgo Portok fitxatu zuen arte. Bi urtez bertan izan zen. 2016ko uztailean Espainiako selekzio nagusiko hautatzaile izendatu zuten, Vicente del Bosque ordezkatuz. Ordutik darama karguan.
Errusiako Munduko Kopa da bere lehen txapelketa nagusia. Azkena izango da, amaitutakoan kargua utzi eta Real Madrilekin hasiko baita lanean. 51 urterekin, beraz, Santiago Bernabeuko aulkira itzuliko da. Eta ez du ardura txikia izango. Zinedine Zidane frantziarrarekin Txapeldunen Liga irabazi du Espainiako taldeak azken hiru urteotan, orain arte beste inork lortu ez duena.