Langile gehien dituzten zentroetan pilatuko dira kaleratze gehienak: 92 izango dira Sarrigurengo ingeniaritza eta I+G zentroan, eta 48, berriz, Zamudioko egoitza nagusian. Kaleratzerik ez da izango Siemens Gamesak Euskal Herrian dituen hiru produkzio guneetan, Mungian, Agoitzen eta Asteasun.
Hala ere, Siemens Gamesako Espainiako adarraren asmoa zen 408 kaleratze egitea 2020ra arte eta ikusteko dago zer gertatuko den tarte honetan. Aurreko astean sindikatuak mahaitik altxatu ziren negoziazio prozesuan. Kaleratzerik ez dutela onartuko esan dute langileen ordezkariek, eta hainbat protesta antolatu dituzte presio egiteko. Lantoki guztietan egin dituzte gaur protestak, baita Asteasun ere.