Martxoaren 23n hartutako erabakia berretsi du Suitzako Justiziak. Suitzako Bulego Federalak baimendu egin zuen asteasuarra Espainiara estraditatzea Madrilek egindako eskaerari erantzunez; orduan epaileek adierazi zuten horretarako «baldintza guztiak» zeudela.
Suitzako Bulego Federaleko epaileek ondorioztatu zuten Txapartegik ez zuela «modu sinesgarrian frogatu ahal izan» Espainian atxilotu zutenean torturatu egin zutela, eta zehaztu zuten Espainiako agintariek ere ez zutela «behar bezala aztertu» aurkeztutako salaketa.
Txapartegi 1999an atxilotu eta espetxeratu zuten, eta salatu zuen preso egon zen tartean torturatu egin zutela. Azken urtean, Suitzan bizi izan da, baina Espainiak hiru urte eta erdiko espetxealdia ezarria dio, ETArekin kolaboratzea egotzita.