Askatasun Taupadak erabiltzaileak bildu du Nekane Txapartegiren mezua bideo honetan:
Asteasuarra apirilaren 6an atxilotu zuten Suitzan, Espainiako Poliziak eta hango Polizia Federalak elkarlanean eginiko operazio batean. Hasiera batean Zurichen bertan espetxeratu zuten eta gero, ekaina hasieran Dielsdorfeko kartzelara lekualdatu zuten. Joan den astean Zuricheko espetxera eraman zuten bueltan.
«Bizi baldintza berdinak mantentzen ditu Zurichen. 22-23 orduz zeldan bakartuta edukitzen dute eta alabak astean behin bisitatzen du. Familiakook ere ordubeteko bisita egin ahalko diogu, baina beti ere, aste barruan», esan dute Txapartegiren senideek.
Presoaren gertukoek ez dakite zertara datorren espetxe aldaketa: «Egia da abendu hasieran Istanbuleko protokoloa egingo diotela Nekaneri eta hori egiteko austriar forentse bat joango zaiola. Bisita hori errazte aldera, Zurichera aldatu ote duten esaten dute. Baina ez dago ezer garbi, hipotesi hutsak dira».
Bien bitartean, Txapartegik zain jarraitzen du Espainiak egindako estradizio eskaerari Suitzako gobernuak zer erantzungo. Hasiera batean, iraila edo urria alderako espero zuten erabakia baina luzetsita daude senideak. «Esan digutenez litekeena da urtea bukatzea eta erabakia hartu gabe egotea. Ziurgabetasun horrek guri eragiten digu, baina pentsa horrek Nekaneri zer desgaste dakarkion».
Gertukoek Txapartegiri idazten jarraitzeko deia egin dute. Hau da espetxean duen helbidea: Nekane Txapartegi.Gefangnis Zurich. Rotwandstrasse 21. Postfach. 8036 Zurich. Switzerland.
Bestalde, hemendik aurrera asteartero 12:45tik 13:00etara eta 15:45tik 16:00etara elkartasun eta sostengu mezuak bidali ahal izango zaizkio Lora irrati librearen bidez, berak zuzenean entzun ahal izan ditzan. Telefono zenbakia honako hau da: 0041445672400.
