Herritar ugari bildu zen atzo Anoetan, Lizarrako Mateo Apestegi haurraren hilketa gaitzesteko. Zazpi urteko umearen heriotza bortxa matxistaren ondorio dela uste dute Anoetako mugimendu feministako kideek: "Amari bizi osorako zigorra eta sufrimendua eragiten dizkiolako da indarkeria bikario kasu bat". Haurraren hilketa indarkeria bikarioko kasu bat izan daitekeela uste du Espainiako Berdintasun Ministerioak ere, eta ikerketa abiatu du zer gertatu den argitzeko.
Guardia Zibilaren helikoptero batek aurkitu zituen asteartean haurraren eta haren aitaren gorpuak, Urbasan, Ubabako amildegian, eta autopsiak baieztatu zuen aitak salto egin zuela 7 urteko semeari helduta. Indarkeria bikarioko kasua dela egiaztatuko balitz, hamabi lirateke 2003tik Euskal Herrian bortxa matxistaren ondorioz hildako haurrak.
Anoetako mugimendu feministako kideek eskatu dute indarkeria matxista lehen mailako arazo politikotzat hartzea: "Badakigu indarkeria matxistak hamaika aurpegi dituela eta emakumeok bizitzako alor guztietan jasaten dugula indarkeria hori". Autodefentsa feministarako deia ere egin dute kontzentrazioaren amaieran. "Gure bizitzak jokoan daude, bizitzaren aldeko apustu erradikala egiten dugu eta badakigu antolakuntza eta autodefentsa izango direla gure tresnarik eraginkorrenak".