Kiroldegiko sukalde berriak ireki ditu ateak

'Irakin' proiektua martxan da; Anoetako Udalak 71.010 euroko inbertsioa egin du gunea egokitzeko.

Dagoeneko martxan dago Abraham Olano kiroldegiko sukalde berria. Duela hilabete batzuk irabazi zuen kiroldegian sukaldea jartzeko esleipena Iñigo Estanga herritarraren Irakin proiektuak, eta aste honetan zabaldu ditu ateak. Gune berri honetan janaria prestatu, ontziratu eta saldu egingo dute, eta litekeena da banaketa ere egitea.

Ekimen honen bidez, tokiko elikadura ardatz duen gunea sortu nahi izan du Anoetako Udalak. Proiektu berritzailea da, egokituta baitago egungo kontsumo ohituretara eta beharretara. Herriko ekonomian eragitea, lanpostu zuzenak sortzea eta tokiko elikadura katea indartzea dira, besteak beste, proiektuaren helburuak.

Bost urterako esleitu zaio zerbitzua Irakin proiektuari, eta aurrez aipatutako helburuak lortzeko hainbat baldintza bete beharko ditu: lehen hiru urteetan produktuen %60a 150 kilometroko erradioan ekoitzia izan beharko du, Euskal Herriko zazpi lurraldeak hartzen ditu erradio honek; hirugarren urtetik aurrera erabilerak %75ekoa izan beharko du, eta produktuen %10 eskualdekoa izan beharko da. Honez gain, proiektuaren esleipen prozesuan tokiko elikagai ekologikoen erabileran azpimarra jarri zen.

Gunearen egokitzapenerako 71.010 euroko inbertsioa egin du udalak; eta proiektuak 39.225 euroko diru laguntza jaso du Gipuzkoako Foru Aldundiko Landa Garapen sailetik. Horrez gain, beste diru laguntza batzuetara ere aurkeztu da proiektua, eta finantzaketarako ekarpen gehiago lortzea aurreikusten dute.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!