Anoetako jaiak 2022

Jokin Tolosa eta Iosune Alberdi azkarrenak Anoetako krosean

Anoeta herria festetan murgildurik dago, kukua oraindik jaitsi ez bada ere. Atzoko parrandari etena jarrita, goiza kirol probetan eman dute anoetarrek. Helduen krosa, festa giroan lehiatu bada ere, Jokin Tolosa eta Iosune Alberdi izan dira helmuga zeharkatzen azkarrenak. Seigarrenez ospatu da gaurkoan Ivan Torres memoriala.

10:45 puntuan suziriak eztanda egin eta Anoetako plazatik abiatu dira korrikalariak, Ataria-ko arkua zeharkatuta. Zehaztutako ibilbideari bi itzuli eginda, berriro ere plazan altxa dituzte besoak korrikalaririk azkarrenak.

Ivan Torres VI. Memoriala Anoetan barrena lehiatu da, herritarren txalo eta animoek lagundurik. Jokin Tolosa izan da gizonezkoetan azkarrena eta berari jarraika aritu dira proba guztian zehar Aitor Irurtzun eta Iban Yurrita. Horrela osatuz hiruko podioa.

Nesken markei erreparatuta, karrerarik azkarrena osatu du Iosune Alberdik eta bere atzetik iritsi dira Naroa Urkola eta Amaiur Luluaga.

Sari banaketa ekitaldia plazan bertan ospatu da eta Ivan Torresen gurasoak izan dira garaikurrak irabazleei emateko ardura izan dutenak.

Festak jarraipena

Anoetarrek festan murgilduta jarraitzeko egunak izango dituzte hurrengoak. Esaterako, gaurkoan, kuadrillen festa izaten ari da, 19:00etan Distopia elektrotxangak lagunduko die giroa musikatuz eta 23:00etan Bada Giro erromeria taldearekin dantza egiteko aukera izango da.

Egitaraua osorik bertan kontsultatu daiteke.

Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!


EGIN ATARIKIDE!