Anjel Mari Peñagarikano bertsolariak Athleticen omenaldia jaso zuen atzo Zornotzan, Bertso-derbiaren barruan. Klub zuri-gorriak urtero saritzen du gizarte edo kultura munduko pertsona bat Athletic Cluben balioak zabaltzen laguntzeagatik eta bertsolari bat saritzen duen lehenengo aldia da. Ezaguna da bertso munduan Anjel Mari Peñagarikanoren athleticzaletasuna eta bertsotan ere baliatu izan du alderdi hori.
Jose Angel Iribarrek Athleticeko atezain ohi mitikoak eman zion saria Peñagarikanori, Aitor Elizegi lehendakaria ere bertan zela. Omenaldiaren harira, Gipuzkoako txapeldun ohiak azpimarratu du azken 30 urteotan futbola eta euskara, eta baita bertsoa ere, elkarrengana asko hurbildu direla eta hori oso positibotzat jotzen du hori.
Bideoa Bertsoa.eus webgunean.
XVIII. Bertso-derbia
Futbola eta bertsoaren arteko harremanaren lekuko, XVIII. bertso-derbia izan zen atzo Zornotzan. Talde zuri-gorriaren ordezkari gisa, Anjel Mari Peñagarikano, Jone Uria eta Aitor Etxebarriazarra aritu ziren, azken hau, Athleticeko atezain izana harrobiko taldeetan. Realeko ordezkari, Andoni Egaña, Maialen Lujanbio eta Amets Arzallus. Xabier Irakulis aritu zen gai-jartzen, Zornotzako bertso-eskolako kidea. Realeko eta Athleticeko fundazioek antolatzen dituzte bertso-derbiak eta jada tradizioa bihurtu da formatu hau, urtero bi saio eginez, gizonezkoen taldeko partidetan.
