Aurreko astelehenean egin beharreko udaleko ohiko osoko bilkura, ostegunean, urriaren 28an egingo dute 19:00etatik aurrera.
Pello Estanga alkateak azaldu duenez, udalaren helburu behinena da herritarrei ahalik eta zerbitzu onenak ematea. Hori horrela eta egoera ekonomikoa kontuan hartuta, zergen %1,5eko igoera proposatuko dute, "beharrezkoa baita oreka mantentzea udalaren diru sarreren eta gastuen artean".
Mozioei dagokienez, berriz, hiru gai landuko dituzte: migrazioari dagokiona bata; energia-horniduraren krisiarekin zerikusia duena bestea; eta azaroaren 25a, emakumeen aurkako indarkeria ezabatzeko nazioarteko egunari buruzkoa azkenekoa. Osoko bilkuran hainbat konpromiso zehatz eskatuko dituzte, besteak beste, migrazioaren gaiarekin: migrazio-politikak garatzeko erakundeen arteko mahaia eratzea; itunean adierazitako asmoak konpromiso bilakatzea, eta horiek lortzeko programak adostea; eta itunak jasotzen duena garatzeko baliabideak jartzea.