Hiru eta zazpi urte bitarteko haurrei eta haien gurasoei begirako bina saio eskainiko ditu Miriam Mendoza ipuin kontalariak Anoetako udal liburutegian, Ipuin txokoa izeneko dinamikaren bidez. Gaur izango da lehen saioa, Haur Hezkuntzako haurrei zuzendutakoa, eta heldu batekin joan beharko dute. Saioa 18:00etan hasiko da.
Hiru eta bost urte dituzten haurrek bigarren saioa azaroaren 25ean izango dute, eta Lehen Hezkuntzako lehen eta bigarren mailetan daudenek, sei eta zazpi urtekoek, azaroaren 4an izango dute lehen saioa eta abenduaren 16an bigarrena. Saio guztiak ostegunetan izango dira, 18:00etatik aurrera.
Anoetako udal liburutegiak antolatutako dinamika da, eta esan dutenez bertaratzeko plazak mugatuak dira, beraz, izena eman beharko da aurrez liburutegian bertan edota liburutegi@anoeta.eus helbidera idatzita.
Saio horietan, haurrek ipuinak entzuteaz gain, gurasoek aukera izango dute seme-alabei ipuinak nola kontatu ikasteko. Horretan ahaleginduko da Miriam Mendoza kontalaria. Eta saioaren amaieran, saioan zehar kontatutako ipuinen liburu gida bana emango zaie gurasoei.
Hiru eta bost urte bitartekoek eta haien gurasoek gaur izango dute lehen saioa, 18:00etan, udal liburutegian.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!