Anoetan euskal nortasuna hauspotu, jakintza eta tradizioak ezagutarazi eta herriko baserritarrei plaza eskaintzeko eguna ospatzen ari dira. Hamahirugarren aldia da Anoetan Euskal Jaia antolatzen dutela eta bigarren urtetik gai bat hartzen dute urtero lantzeko, baina aurten ez da azoka ardaztuko duen gairik izan.
Euskal Jaiak beti izan ditu bi oinarri, euskal kultura bultzatzea eta tokiko elikadura indartzea, eta bi sektore horiek bereziki kolpatuak izan dira pandemia honetan. Hori dela eta, ohikoa baino postu gutxiago izan dira aurten ospatu den azokan; 19 postu guztira. Ekimenak tokiko elikadura bultzatu eta indartzea helburu duenez, lehentasuna herriko eta eskualdeko ekoizleek izan dute. Besteak beste, Anoeta bertako Barrundi eta Sarobe baserrietako barazki eta esneki ekologikoak, Amezketako Eguzkileireren ogia eta gozoak eta Larteko gazta izan dira salgai. Anoetako Otero pilotagileak ere izan du bere postua, baita kosmetika naturala eta eztia ekoizten dituen Bidatz Sasiain tolosarrak ere. Lurraldetasunari ere begiratu nahi izan diotenez, Nafarroa, Behe Nafarroa eta Arabatik etorritakoak ere ikusi ahal izan dira azokan.