Osasun larrialdiaren ondorioz bizi izan den itxialdian zaintza lanen balioa eta pisua zenbatekoa den argira atera da, beste behin ere. Eta lan horien ardura, orokorrean, emakumeengan geratzen dela ikusi da. Egoera honek, bestetik, aurrez ere egoera zaurgarrian zeuden emakumeen egoerak gogorragoak bilakatu ditu. Udaleko leihotik herrira izeneko ekimenaren barruan Sheila Melcon Lopez psikologoarekin egindako azkeneko elkarrizketan emakumeek bizi dituzten askotariko egoeren inguruan hitz egin zen, eta beste behin ere, emakumeek jokatzen duten papera bistaratu zen, etxeen eta gizartearen sostengu.
Osasun larrialditik irteten ari garenean, emakume askok bizi izandakoaz hitz egiteko beharra dute. Elkarrekin saretu eta elkar entzuteko gune bat sortu nahi dute Anoetako Udaletik. "Egoera gogor asko bizi izan ditugu emakumeok, eta psikologikoki ahultzeko arriskuaren aurrean, elkartu eta indartzeko unea iritsi da", esan dute udal ordezkariek. "Beraz, elkartu gaitezen eta hitzegin dezagun guretzat sortutako gune seguru batean".
Ekainaren 30ean, Anoetako udal liburutegian egingo dute zita Anoetako emakumeek eta kontu-kontari ariko dira, 16:00etatik 18:00etara. Haurtzaindegi zerbitzua eskatzeko kultura@anoeta.eus helbidera mezu bat idatzi beharko da edo bestela WhatsAppez egin daiteke eskaera, ekainaren 29a baino lehen, 688 60 16 79 telefonoan.