Ostiral arratsaldean, erasoa gertatu izanaren zurrumurrua herrian zabaldu bezain laster, Ertzaintzara deitu zuen Pello Estanga Anoetako alkateak, gertaeren berri lehen eskutik jakiteko. Iloba batek izeba erasotu zuen eta honek, babesteko, bere burua giltzapetu zuen etxe barruan. Erasotu eta erasotzailearen artean bikote harremana ez dagoenez, Ertzaintzak ez du genero indarkeriaren protokoloa martxan jarri.
Anoetako Udala eta Anoetako Emakume Taldea erasoari zein erantzun eman erabakitzeko larunbatean elkartu ziren eta "irmoki" gaitzetsi zuten ostiraleko erasoa. Atzo Josune Eizmendi Parekidetasun zinegotzia erasotua izan zen emakumearekin bildu zen, hari udalaren laguntza eta babesa eskaintzeko. Anoetako Udalak feminismoaren bidetik lanean jarraituko duela adierazi du eta indarkeri matxistaren aurka lanean jarraitzeko konpromisoa erakutsi du. Hain justu, Anoetako Udala eta herriko eragileak genero indarkeria eta eraso sexisten aurkako protokoloa lantzen ari da eta gaur dute prozesuaren azken bilera.
Anoetan gertatutako erasoa eta Gasteizen ostiralean bi emakume erail zituztela salatzeko elkarretaratzea egingo dute gaur, udaletxe aurrean, 19:30ean. Anoetako Udalak eta Anoetako Emakume Taldeak herritarrak gonbidatu dituzte elkarretaratzean parte hartzea, "guztion eskubidea baita parekidetasunean oinarritutako jendartearen parte izatea, guztion ardura, berau eraikitzea".