Loteriaren bigarren sariko 18.442 zenbakiko dezimo bat saldu duzu. Nola hartu zenuen albistea?
Pozik, oso pozik. Bat bakarra izan da, baina hala ere, horrelako albisteak pozik hartzen dira. Hasieran ez nuen sinistu ere egiten. Hori bai, nahiago nukeen saria anoetar gehiagoren artean banatu izan banu.
Zuk aukeratu al zenuen zenbakia?
Kasu honetan ez. Makinak ausaz emandako zenbakia izan da saritutako dezimoa. Norberak nahi duen zenbakia hartzeko aukera ere badago, beti ere libre baldin bada, baina, bestela, makinak bat proposatzen dizu. Saritutako hau horrela banatu genuen.
Badakizu nor den irabazlea?
Ez dakit nor den, ez da azaldu. Eguberriko zozketarako zuzenean guk saldu genituen dezimo batzuk; propio erosita genituen zenbakiak ziren. Baina Erregeetako loteriako zenbaki gehienak makina bidez saldu ditugu. Gainera, esango nuke, anoetarra ez den jende ugari ere ibili dela aurten loteria erosten. Beraz, agian ez da anoetarra.
Zenbat diru jasoko du saridunak?
75.000 euro jasoko ditu, nahiz eta ondoren, Ogasunak %20a kenduko dion.
Sari potolo bat banatzen duzun lehen aldia al da?
Bai. Bi urte egingo ditu otsaila bukaeran administrazioak, eta ezin gehiago eskatu. Egokitu dadila gehiagotan eta gehiagorentzat!