Egun handia izan zen. Berarentzat ez ezik, baita anoetarrontzat ere. Goiz goizetik hasi genuen eguna; Anoetako 35 gazte inguru Lesakako Gazte Egunera gonbidatu gintuzten, eta hara joan ginen goizean. Lesakan bapo-bapo bazkaldu, eta Iruñera: mozorroak lagun, pankartak eskuan, eta umore ona nagusi, gure herrikidea, eta batez ere laguna, animatzera.
Lehenengo partida bukatuta zegoen pilotalekura sartu ginenerako. Ez zen berehala amaitu bigarrena. 4-9, 7-11, 14-15, 17-17, 19-21 eta azkenean, 22.ena. Amaitu zen bigarren partida ere; iritsi zen momentua, finalaren txanda.
Kantxara atera ziren pilotariak; hasi ziren lehen oihuak. Jarraitzaile guztiek argi utzi nahi zuten nor animatzera joan ziren, baita guk ere; giro paregabea zegoen Labriten.
Sakea aurkarientzat; hasi da partida, eta ez guk nahi genuen bezala; izan ere, 4-0 jarri ziren aurretik Larunbe eta Agirre. Urduri ere jarri ginen anoetarrak; Toloxak ordea, lasaitasun itzela transmititzen zuen, eta eman zizkion fruituak.
Hamabi tanto egin zituzten segidan; Toloxa ondo eusten ari zen atzean, segurtasunez, lasai eta sendo, eta Gorka joko handia egiten ari zen aurrekaldean. Bikote ezin hobea osatu zuten.
12-4 markagailua. Aise ari zirela pentsatuko du baten batek; jokoa ordea, markagailuak erakusten duena baino justuagoa eta borrokatuagoa izan zen. Ez zieten ezer oparitu, eta anoetarrak gozatzen ari ginen, bai jokoarekin, eta bai emaitzarekin.
Markagailuan tantoak goraka zihoazen, eta 22.ena ere gertuago zegoen. Kortaturen Sarri doinuak ere ekarri genituen frontoira: Xabi, Xabi, Xabi, Xabi...Txapelarekin amesten ere hasi ginen, bigarrena baietz! oihukatuz.18, 19, 20, 21 eta 22.ena ere bai. Amaitu zen partida.
Toloxa txapeldun! Anoetarrak herriko pilotariarekin harro, eta pozik. Kantxara jaitsi ginen, txapela jartzeko momentua gertutik ikusteko. Zeinen ondo geratzen zaion, benetan merezitako txapela. Laguna zoriondu genuen eta argazkia.
Zorionak Toloxa, benetan, eta bejondeikela! Ez dek azkena izango, ibilbide oparoa izango dek, eta aukera gehiago izango dizkiat elkarrizketa hori egiteko! Larunbatean bezala, anoetarrak hirekin egongo gaituk bide honetan. Gozatu txapelaz!