Erraustegi plantaren kontu honekin "sututa" daudela esan dute korrika txikian parte hartu duten eragileek. "Herritarroi ezin zaigu bizkar eman eta guk izan behar dugu egiten den politika ororen protagonista".
Hondakinak errausteak osasunean duen eragin "kaltegarriak" aski beharko luke ekimena babestu dutenen ustez, "hondakinak tratatzeko modu hau alboratzeko". Birziklatze datuek gora egiten duten aldiro errauste planta bultzatu nahi dutenen argudioak "hanka motz" geratzen direla uste dute korrika txikiko parte hartzaileek.
Diru publikoaren xahuketa ere salatu dute: "helburu ekonomikoa besterik ez duen proiektu honetan gastatu nahi dute gipuzkoarron poltsikotik ordaindu beharko den 300 milioi euroko gastua, bestelako behar sozialak lehenetsi beharrean".
Umorea eta irudimena erabili dute errausketaren aurkako gaurko ekimena gauzatzeko eta aurrerantzean ere, "lanean jarraituko dugu horrelako proiektuek lekurik izan ez dezaten", esan dute korrika txikiaren amaieran plazan egin duten ekitaldian.