Lehenengo hiru egunetan bilerak egin dituzte, zahar etxean, etorkinekin eta gaztetxean. Guztien artean erabaki dute zein irudi nahi dituzten marraztu. Arantxa Orbegozo "txitxi" margolariak azaldu duenez, "bakoitzak herria nola ikusten duen eta nola adierazi nahi duen esateko aukera eman dugu".
Behin muralean zein marrazki joango diren adostuta, bi egun hartu dituzte marrazteko. Istorio bat asmatzeko adina leku eduki dute horman eta halaxe egin dute. Anoeta herriaren aspaldiko irudi bat margotu dute lehenik eta horren jarraian, lurralde ezberdinetako jendea soka dantza dantzatzen. Bi eskuz inguratzen duen munduko bolak hartzen du tokia geroago eta hortik letra solte batzuk eta hitzak ateratzen dira. Segidan, anoetarrak kukuak direnez hauxe marraztu dute eta kolore ezberdinen nahasketa luzatu da ikurrina iritsi arte. Ondoren, haurren marrazkiek hartu dute lekua eta amaitzeko, neskatila bat marraztu dute arkatza heldu bati ematen guztia berak margotu izan balu bezala.
Guztia egiteko Eusko Jaurlaritzak diru laguntza eman diete eta Anoetako Udalak 1000 euroko ekarpena egin du.