Anoeta Futbol Taldeak Gipuzkoako Seniorren Ligako Kopa irabazi zuen iragan astean. Denboraldia lehen bi postuetan amaitu zuten taldeek jokatu zuten finala: eskualdekoak bigarren sailkatu bezala aritu ziren, Idiazabalen aurka. Ane Kabero jokalariaren esanetan, partida tentsio handikoa izan zen: «Galtzen hasi ginen. Gero, berdinketaren gola sartzea lortu genuen, baina berriro eurak aurreratu ziren. Binako berdinketa azken unean lortu genuen, eta gero, penaltietan, irabazi egin genuen». Kaberok Anoetako atezaina nabarmendu zuen, penalti bat gelditzea lortu baitzuen.
Anoeta Futbol Taldea herriko jokalariz osaturik dago, 16-24 urte bitartekoez. Azken denboraldietan geldirik egon ondoren, Gipuzkoako liga aurten hasi da jokatzen berriro, eta garaipena, Anoetara ekarri dute.
Kaberok ligak jarraitzea eta talde gehiagok parte hartzea nahi du. «Laguntza oso gutxi jasotzen dugu, eta zailtasunak ditugu aurrera egiteko. Emakume askok adin batetik aurrera utzi egin behar izaten du kirol hau ez daukalako praktikatzen jarraitzeko aukerarik». Zentzu horretan, ateak zabalik dituztela dio Kaberok: «areto futbolean jokatu nahiko lukeen emakume oro gustura hartuko genuke».