Hilaren 25ean egingo dute Haria ikuskizuna Amezketan Oinkari dantza taldeak eta Julen Alonso musikariak. Larrunarri pilotalekuan izango da emanaldia, 19:00etan, eta sarrerak dagoeneko eskuragarri daude 10 euroren truke.
Ikuskizunak musika eta dantza uztartzen ditu, euskal tradizioa eta eguneroko bizitza oinarri hartuta, eta emozio zein sentimendu ezberdinetatik bidaiatzea proposatzen du: «Alaitasunetik goxotasunera, indarretik samurtasunera».
Musika eta dantza
Oholtza gainean izango dira Oinkari dantza taldeko kideak, eta protagonista Alonso izango bada ere —trikiti eta piano jotzailea zein abeslaria—, harekin batera ariko dira Uxue Kerejeta pandero jotzaile eta abeslaria, Gorka Urra gitarra jotzailea, Iker Telleria perkusionista, Beñat Armendia piano jotzailea eta Amaiur Cajaraville baxu jotzailea.
Amezketako Udalak antolatu du hitzordua, eta informazio gehiago jaso nahi izanez gero udaletxera jo daitekeela adierazi du.