Bihar —urriaren 25ean— Goitibera Sari Nagusia jokatuko dute Amezketan, eta hainbat eragozpen sortuko ditu horrek herriko bideetan. Eragina trafikoan eta aparkalekuetan izango da batik bat.
Sasturain tabernaren atzeko eta elizaren atzeko aparkalekuak hutsik utzi beharko dira 12:30etik aurrera. Horrekin lotuta, arratsaldeko autobus zerbitzuaren ibilbidea ere aldatuko da. 14:45eko eta 18:20eko autobusek soilik herriguneraino emango dute zerbitzua, Ergoenera igo gabe.
Horrez gain, Sasturain paretik hasi eta Bordatxurirainoko errepidea itxita egongo da 15:30etik 19:00etara. Tarte horretan, 40 minutuz behin irekiko dute ibilgailuek igaro ahal izateko. Lasterketa Bordatxuritik abiatuko da, eta parte-hartzaile bakoitza 40 segundoro aterako da irteerako puntutik.
Herritarrei gomendioak
Amezketako Udalak «pazientzia eta ulermena» eskatu die herritarrei, eta nabarmendu beharrezkoa izango dela boluntarioen eta antolatzaileen argibideei kasu egitea proba segurtasunez jokatzeko. Era berean, ingurumena zaintzeko gogora ekarri du ikusle bakoitzak sortzen duen zaborra berekin eraman beharko duela: «Mesedez, ez utzi ezer lurrean eta lagundu dezagun ingurua garbi mantentzen».
