Amezketan 36ko gerrak izan zituen ondorioak jasotzen dituen Amezketa (1936-1945) Zigorpean isilaraziei, merezitako aitorpena liburuaren aurkezpena egin zuten, igandean, kultur etxeko areto nagusia goraino beteta zela. Ekitaldian, Antton Amondarain idazleak eman zituen liburuan aurkituko denaren aurrerapen batzuk, eta Alaitz Artolaren musikak, Bixente Gorostidiren bertsoek, Imanol Artolaren aurkezpenak edota Izaskun Lazkanok gerrako biktimen omenez egin duen obraren aurkezpenak jantzi zuten ekitaldia. Amaitzeko, udalak luntxa eskaini zuen Zazpiturri elkartean. Amezketako etxe bakoitzak liburu bat hartu dezake, eta ekitaldian liburua hartu ez zutenek, udal bulegoetan izango dute eskuratzeko aukera datozen egunetan.
Hiru urte iraun dituen prozesu baten amaiera izan da liburuaren argitaratzea. Amondarainek informazioa aztertu, testigantzak bildu edota dokumentuak eskuratu ditu liburua osatzeko. Denbora tarte horretan etorri da liburu horretan oinarrituta zegoen eta herritarrek egin zuten antzerkia ere. «Amondarainek ezagutzera eman dizkigu Amezketan gertatu zirenak, eta betirako gordeta geldituko dira hurrengo belaunaldiek ere jakin ditzaten», esan dute udalekoek.