Bueltatu dira talaiak Amezketara. Urtebeteko etenaren ostean, arropak eta makilak armairutik atera eta etxez etxe ibili dira, atzo eta gaur, dantzan. Atzoko eguna baserriz baserri pasa zuten, bi taldetan banatuta. Batzuk Amezketako baserrietan barrena ibili ziren eta besteak Bedaio inguruan. Azken dantza, ohiko moduan, bi ilaratan egin beharrean, borobilean amaitu zuten.
Eta gaur goizean fin asko atera dira berriro ere. Batzuk Ugartetik abiatu dira, eta beste taldea Zubillaga auzoko baserrietan barrena ibili da. Okindegi inguruan elkartu dira eta herrigunea guztiek elkarrekin gurutzatu dute. Indarrak amaitu aurretik geldialdiak egin dituzte tarteetan, mokadu bat edo beste ere jan dute, eta ondoren ozen jo dituzte makilak elkarren kontra; hautsi ere egin dira batzuk. Arratsaldean amaituko dute ibilbidea, etxe guztien atariak alaitzen dituztenean.
