Zailtasunak zailtasun Amezketako Udalak abendua bitartean kultur ekitaldiak antolatu ditu, ahal izan duen moduan. Kultura Batzordeak, Gabonetatik aurrera ere lanean jarraituko duela aurreratu dute, eta herritarrei proposamen berria egin die.
Herritarren ideiak bildu nahi dituzte, eta bi galdera luzatu dituzte: "Zein ikastaro jasoko zenuke?" edo "zein ikastaro emango zenuke?". Alde batetik herrian zein ikastaro egotea nahiko luketen jakin nahi dute. Bestetik, herriko bizilagunei eman nahi diete aukera. Jakituria handiko jende asko dagoela azpimarratu dute udaletik, eta ea norbait ikastaroren bat ematera animatuko litzatekeen jakin nahi dute. Horretarako etxez etxe banatu duten orrian idatzi eta udaletxean entregatu beharko da, edo 606 79 55 36 telefono zenbakira idazteko aukera dago. Biharko da ideiak jakinarazteko azken eguna.
Behin ideia guztiak jasota, Kultura Batzordeak, etzi, hilak 16, bilera egingo du. 19:00etan elkartuko dira eta bertan aztertuko dituzte jasotako ideiak. Herritarrei bilerara joateko gonbidapena luzatu diete.