Partida ikusgarria jokatu dute Altunak eta Bengoetxeak Iruñeko Labrit pilotalekuan. Baina Bengoetxea aritu da Altuna baino hobeto, eta hainbat tanto eder egin ditu. Leitzarrak berak azaldu du hainbat tantotan arriskatu egin duela eta atera zaizkiola egin nahi zituenak.
6-5 joan da irabazten Altuna, baina hor tanto batzuk egin ditu segidan Bengoetxeak eta gero tarteari eusten jakin dio. Partidaren bukaera aldera 16-18 gerturatu da amezketarra, baina leitzarrak ere berriro arriskatu eta hirugarrenez jantzi du txapela.
Altunak azaldu duenez, aurkariari "dena atera zaio, eta horren kontra aritzea zaila da. Oinatzek beti erakusten du berea ematen duenean kontrario oso zaila dela. Nik ez dut guztiz nirea eman". Halere, tanto ikusgarriak ere egin ditu amezketarrak, eta piloteoan agindu egin du, baina ez da nahikoa izan maila oso altua eman duen Bengoetxearen aurrean. Altunak gaineratu du pena eman diola txapela ez irabazteak, baina finalean egoteari bere garrantzia eman dio. "Harro nago egindakoarekin", esan du. Orain, San Fermin Torneoko binakako txapelketa du jomugan amezketarrak.