Ezkurdia eta Zabaletaren aurka jokatu zuten lehia, eta amezketarra izan zen lauretan onena. 11 tanto lortu zituen Altuna III.ak, eta baita bi sake ere. Lau hutsegite ere egin zituen. Barriolak ez zuen tantorik egin, baina hutsegite bakarra eginaz, oso bikote sendoa osatu zuten. Ezkurdia ez zen fin ibili, eta zazpi kaleko partida egin zuen. Jokoan beste horrenbeste tanto egin zituen, baina 12an geratu zen Zabaletarekin. Atzelariak lau hutsegite izan zituen.
Finalerdietako partida uztailaren 24an jokatuko dute Altunak eta Barriolak Irribarria-Rezustaren aurka, Etxebarrian, 17:30ean. Aurkari berberen aurka beste partida bat jokatu beharko du larunbatean amezketarrak Zabaletarekin, Errenterian. Jaialdiko bigarren partida izango da; lehenengoa Retegi-Merino II.ak eta Ugalde-Zubietak jokatuko dute.