Laugarren postua hiru garaipenera gera daiteke Altuna III-Merino II.arentzat, gaurko partida galdu ostean. Bigarren itzuliko lehena zen, eta Irujo-Rezusta nagusi izan dira, batez ere Bergarako atzelaria. Partida oso serioa jokatu du Rezustak, aginduz eta pilota bakarra galduz. Jokin Altuna saiatu da, baina ez da bere bolada onenean. Azken partidako sentsazio onak aprobetxatu nahi zituen bide horretan jarraitzeko, baina ez da horrela izan. Hurrengo jardunaldian Artola-Albisu izango dituzte aurkari, larunbatean, Idiazabalen.