Hamalau urteko ibilbideari agur esan dio Ekaitz Saralegik, Asegarcek kontratua ez berritzea erabaki eta gero. Atzo, merezitako omenaldia jaso zuen Amezketan, senide, lagun eta gainontzeko herritarren partetik.
"14 urte hauetan ez dut txapelik irabazi, baina pilotari maitatua izan naiz". Hitz horiekin, hunkituta, agurtu zuen amezketarrak jendez bete zen Larrunarri pilotalekua. Amezketako udalaren, Zazpi Iturri eta Intxurre pilota elkarteen, kuadrillaren, familiaren eta Asegarceren opariak ere jaso zituen.
Partida gutxienekoa izan zen: 22-21 irabazi zuten Saralegik eta Beginok, Altuna III.a eta Larunberen aurka. Azken sakearen aurretik iritsi zen arratsaldeko unerik ederrenetako bat, sakea egin baino lehen, Saralegi bere bi semeengana urbildu eta eskumuturrekoak eman zizkienean.
Hortik aurrera, festa izan zen nagusi, amezketarren eta pilotazaleen festa, pilotari handi bati merezitako agurra emateko.
