Ekainaren 24an bildu ziren Amasa-Villabonako Udaleko eta URA Agentziako ordezkariak, azken bi urteetan egin duten lehen bileran. Han jakinarazi zieten Oria ibaia bere bidetik ez ateratzeko 1,20 metro inguruko altuera eta 100 metro inguruko luzera izango dituen horma eraikiko dutela. Horrez gain, inguruko euri urak biltzen dituzten hodiak ere egokituko dituzte, gainezka egin ez dezaten eta ibaiaren ur maila handia denean ere ura ibaira bideratu ahal izateko.
Azken urteetan, Oria ibaiak bi aldiz gainezka egin du Kale Berriaren hasierako zatian: 2021eko abenduan eta 2024ko otsailean. Uholdeek kalte handiak eragin dituzte inguruko etxabe eta garajeetan, eta putzu handiak sortu dituzte errepidean. Errepidea Gipuzkoako Foru Aldundiaren jabetzakoa denez, Bide Azpiegituretako Sailarekin elkarlanean eta koordinatuta garatuko dute proiektua.
Araba, Bizkai eta Gipuzkoako ibaien eta ibai ertzen eskumena URA Agentziarena da. Azken urteetako uholdeek eragindako kalteak ikusita, Beatriz Unzue alkateak gutun ofiziala bidali zion agentziari konponbidea eskatzeko. 2024an egin zuten bi erakundeek lehen bilera, eta orduan URAk uholde arriskua murrizteko lanak bere gain hartzeko konpromisoa hartu zuen. Harrezkero, ordea, udalak ez zuen proiektuaren inguruko berririk jaso, joan den ekainaren 24ko bilerara arte.
Udalak ontzat jo du URA Agentziak proiektua bideratzeko emandako pausoa, eta espero du lanekin behin betiko amaitzea uholdeek eragindako kalteak. Era berean, proiektuaren garapenari jarraipen zorrotza egingo diola jakinarazi du.