Beste urte batez, Villabonako Irrintzi elkarteak antolatuta, Azoka Berezia egin dute goizean, Errebote Plazan. Eguraldia lagun izan dute ekitaldiaren 29. edizioan, eta horri esker, herritar nahiz bisitari asko bildu da plazan.
Ohiturari jarraituz, bi lehiaketa egin dituzte. Batetik, isats gisatuarena. Zortzi elkartek parte hartu dute aurten, eta epaimahaiaren iritziz, Asteasuko Aitzondo elkarteak kozinatutakoa izan da onena. Behar Zana elkartea izan da bigarren, eta Amasako Uxo Toki hirugarren.
Bestetik, azokako postuen lehiaketa ere egin dute. Hiru postu onenek jaso dute epaimahaiaren saria. Mikel Berastegiren postua sailkatu da hirugarren, Gonzalo Garciarena bigarren, eta Agurtzane Alkaiaga ibartarrarena, txapeldun izan da.