Uztailaren 24an abiatu zituzte billabonatarrek Santio Jaiak eta zortzi egunetan zehar izan dute zertaz gozatu. Atzo izan zuten festarako azken eguna, eta amaiera ezinhobea eman zioten aurtengo Santio Jaiei. Hain zuzen, garai batean jaien azkeneko egunean egiten zen erroskillaren erretzearekin agurtu zituzten festak.
Txupinazoarekin batera, festak hasi ziren egunean udaletxera igo zuten Jon Iñaki Ormazabal herriko artistak egindako erroskilla. Bertan egon zen, atzo, erroskillaren hileta ospatzeko jaitsi zuten arte.
Herritar talde batek hartu zuen erroskilla, eta horiek kultura ezberdinetako heriotza errituez mozorrotuta zeuden. Lehen, ohitura katolikoari jarraituz, denak beltzez jantzita ateratzen ziren. Atzo mozorrotzeko deiarekin bat egin zuten herritar ugari animatu zen heriotza errituez mozorrotzera. Honela, erroskilla eskutan hartuta, herriko kaleetan zehar kalejiran ibili ziren, Lasko txarangak girotuta.
Errebote plazara iritsita, herritar ugari zituzten esperoan, eta plazaren erdigunean zegoen sutzarrera bota zuten erroskilla aurtengo Santio Jaiei amaiera emanez. Horren ostean, ohi bezala, Santioetako irudien proiekzioa egin zuten.